Dili-Primeiru Ministru RDTL, Sr. Taur Matan Ruak, Ministra da Educação, Juventude e Desporto, Sra. Dulce de Jesus Soares, Bispu Diocese Dili, Dom Virgilio do Carmo, halo lansamentu limpeza jerál ho tema “ Dili moos, fuan moos”, iha katedrál Dili, 29/03/2019.

Bazeia ba sirkular husi VIII Governu Konstitusionál, katak sesta feira semana ikus kada fulan instituisaun hotu-hotu Governu nian sei hala’o limpeza iha Dili, hanesan kapitál nasaun. Atu konkretiza desizaun Governu ne’e Ministra da Educação, Juventude e Desporto servisu hamutuk ho Bispu sira iha Diocese tolu atu mobiliza mós estudante sira husi eskola publika no eskola privadu katólika iha Timor laran tomak, nune’e iha sesta feira 29/03/2019 hala’o lansamentu ho tema ba Diocese Dili maka “ Dili Moos, Fuan Moos”.

Iha nia intervensaun Bispu Diocese Dili hato’o katak, objetivu husi lansamentu Limpeza Jerál ne’e hakarak atu kuda iha Juventude estudante sira nia fuan katak Timor Leste ne’e sira nian no Dili ne’e sira nian, nune’e sidade Dili tenke moos hanesan estudante sira nia fuan. Bispu mós hatutan tan katak formasaun atitude ema nian atu hadomi nia ambiente tenke hahú husi labarik sira nune’e wainhira sira boot iha ona responsabilidade ba sira nia-an no sira nia ambiente ne’ebé sira hela ba.

Iha fatin hanesan Ministra da Educação, Juventude e Desporto, Dulce de Jesus Soares hatán ba Jornalista sira katak, inisiativa ida hahú kedas wainhira hira Ministério ho Bispu Diocese Dili deside Sao João Paulo II, sai nu’udar mahein ba Edukasaun, nune’e mosu hanoin ida katak tama ba tempu Kuarezma sei halibur estudante sira iha Timór laran Tomak atu halo limpeza jerál ida hodi kontribui ba ambiente moos. Ministra Dulce mós informa katak, Ministériu mós haruka karta ba Diocese Baucau no Maliana atu mobiliza estudante sira atu halo limpeza jerál, ho objetivu bele kuda Karatér dixiplina no responsabilidade iha estudante sira hodi bele kontribui ba ambiente ne’ebé moos.