Dare, 24-25/04/2014 - Ministériu Edukasaun enkoraja no fó espíritu fresku ba ninia diretór nasional no distritu sira atu alkansa planu ne’ebé Ministé­riu elabora ba dezenvolvimentu edukasaun ba oin, Ministériu Edukasaun hala’o inkontru nasional durante loron rua iha Dare (24-25/03/2014) hodi halao avaliasaun ba rezultadu programa 2013 no haré ba programa imple­mentasaun 2014 ba ezekusaun or­samentu Ministériu nian, durante inkontru ne’e sei análiza no hadia servisu Ministériu nian.

“iha ne’e hau ho Vise ministru nain tolu ho sistema jestaun lideransa ne’ebé partisipativu no akomodativu tebes rona polítika no planu husi diretór sira atu bele implementa. Dala barak ita hasoru difikuldade iha ezekusaun orsamentu nian,”esplika Ministru Edukasaun Bendito Freitas iha deskursu ba inkontru nasional iha Dare.
Nia esplika liu tan katak inkon­tru ne’e fo Espíritu dinámika motivasaun no responsabilidade ho euntuziasmu servisu diak ba diretór sira husi nasional no dis­tritu, Semináriu ne’e importante tebes atu buka dalan ba dezafius boot iha komportamentu umanu nian.

Ministériu boot hanesan eduka­saun, la’os presiza de’it jestaun polítika maibé responsabilidade pesoal umana ne’ebé kompetente iha servisu profisionais diretór sira nian ne’ebé atende konaba servisu administrativus tanba ne’e mak iha semináriu ne’e aprezenta mós fáze umanismu iha responsabilidade nian no hein katak bele hetan motiva­saun no inspirasaun diak liu tan husi inkontru ne’e atu bele servisu ho diak liu tan.

Vantazen ba inkontru ne’e, Ben­dito hatete hafoin hala’o semi­náriu, Diresaun ida-idak haré fila fali servisu liu-liu iha depar­tamentu sira no nível distritu sira hanesan diretór distritu sira no superintendenti iha vizaun ida nakloke liu tan konaba pros­esu mekanismu ne’ebé aprezenta ona hodi fasilita prestasaun servisu iha sira nia servisu fatin.
Ministru esklarese liu tan katak ba diretór nasional sira presiza aumenta responsabilidade no komprimisu atu hadia mekan­ismu servisu iha Ministériu Edukasaun.

“Dala ruma orsamentu no polí­tika iha maibé, la hatudu kbi’it hodi maneza osan ne’e, ida ne’e dehan ezekusaun baixa tanba la’os orsamentu laiha. Maibé tanba sa maka la ezekuta, kbi’it mak laiha ou vontade maka laiha, tanba ne’e maka durante semináriu ne’e diretór sira kon­sentra buka solusaun ba dezafi­us hirak ne’e.
Diretór jerál, nasional no distritu sira tenki sente katak sira hanesan líder ida tenki tau responsabilidade iha ida-idak nian an hodi produz rezultadu iha misaun hanesan director. No diretór distritu sira nia respon­sabilidade todan tebes tanba iha papél importante liuliu jestaun distritu nian.