Previous Next

VISE-MINISTRU EDUKASAUN, JUVENTUDE NO DESPORTU PARTISIPA IHA REUNIAUN ESTRAORDINÁRIU KONSELLU MINISTRU

Díli, 6/8/2020 - S. Exa. Vise-Ministru Edukasaun, Juventude no Desportu Dr. António Guterres partisipa iha Reuniaun Konsellu Ministrus Estraordináriu hodi reprezenta Ministériu Edukasaun, Juventude no Desportu tanba S. Exa. Ministru Edukasaun, Juventude no Desportu hala'o hela vizita ofisiál ba Munisípiu Bobonaro.
Konsellu Ministrus hala’o sorumutuk iha Palásiu Governu, iha Dili, no aprova ona projetu Dekretu Governu nian, ne’ebé aprezenta husi Primeiru-Ministru,Taur Matan Ruak kona-ba medida ezekusaun ba deklarasaun Estadu Emerjénsia ne’ebé efetua husi Dekretu Prezidente Repúblika nian nu. 55/2020 iha loron 5 fulan-agostu, hodi hatán ba pandemia COVID-19 nian. Estadu Emerjénsia abranje teritóriu nasionál tomak no vigora entre oras 00:00 loron 6 fulan-agostu to’o oras 23:59 iha loron 4 fulan-setembru tinan 2020.
Dekretu Lei ida ne’e Governu determina katak ema hirak ne’ebe maka hakarak tama mai no sai husi teritóriu nasionál obrigatoriamente sujeitu ba kontrolu saúde nian no izolamentu profilátiku (karantena) ho durasaun minima loron 14.
Proibidu ba Kareta, roo ka aviaun atu tama, ema hirak ne’ebé maka moras saida de’it husi sintoma tuir-mai ne’e: hanesan temperatura isin sa’e to’o 37,50 c; mear, garganta moras, konstipasaun; no susar dada is ka falta ar, ezetu iha kazu evakuasaun médika.
Dekretu Governu nian impoen realizasaun teste ba COVID-19, ema se de’it maka tama mai teritóriu nasionál no aprezenta sintoma saida de’it temi iha parágrafu anteriór, iha kazu ne’ebé diagnostika ona ba COVID-19, obrigatoriamente tama iha izolamentu terapéutiku.
Hela iha konfinamentu obrigatória, durante loron 14 ka to’o simu alta médika, iha estabelesimentu saúde, iha uma rasik ka sentru izolamentu Estadu nian, ema ne’ebé infetadu ho SARS-CoV-2, ne’ebé tama iha teritóriu nasionál mai husi rai-li’ur ka ne’ebé hasoru vijilánsia husi autoridade saúde sira.
Iha kazu ezesionál sira, justifika tuir razaun saúde no siguransa populasaun nian sira, Ministru Interiór bele determina enseramentu temporáriu iha postu fronteira.
Durante períodu vijénsia Estadu Emerjénsia nian, lisensa, autorizasaun no atu administrativu no dokumentu sira hotu mantein válidu independentemente dekursu husi prazu validade rasik.
Fiskalizasaun kumprimentu dispozisaun ba diploma ne’e kompleta ona forsa no servisu seguransa no ekipa vijilánsia epidemiolójika no sanitária la fó dalan ba atu rezisténsia ativa no pasiva ba ordem sira ne’ebé mai husi autoridade públika kompetente iha ezekusaun ba deklarasaun Estadu Emerjénsia.
Konsellu Ministrus aprova projetu Rezolusaun Governu ne’ebé prosede ba alterasaun dahuluk Rezolusaun Governu nian nu. 20/2019, loron 14 fulan-jullu, ne’ebé nomeia Autoridade Nasionál ba Expo Dubai tinan 2020 nian, la dependénsia tan ba Primeiru-Ministru no pasa dependénsia fali ba Ministru Turizmu, Komérsiu no Indústria, departementu Governamentál ne’ebé responsavel ba konsesaun, ezekusaun, koordenasaun no avaliasaun polítika, ne’ebé defini no aprova ona husi Konsellu Ministrus ba área Turizmu, atividade ekonómika komersiál no indústria.
Aprova ona projetu Rezolusaun Governu nian, ne’ebé aprezenta husi Primeiru-Ministru, sei fixa ba vaga promosaun pesoál integradu iha kareira rejime jerál administrasaun públika. Vaga hirak ne’e sei destina liu ba promosaun ne’ebé fixa anualmente husi Governu, liuhusi proposta husi Komisaun Funsaun Públika to’o limite pursentu sanulu husi totál pesoál iha kategoria ida-idak ka grupu profesionál.
Konsellu Ministru aprova ona projetu Rezolusaun Governu nian, ne’ebé aprezenta husi Ministru Presidénsia Konsellu Ministrus, Fidelis Manuel Leite Magalhães, relasaiona ho kriasaun Komisaun Koordenadora no akompañamentu ba Reforma Institusionál sira reforma administrasaun públika, reforma jestaun finanseira públika, desentralizasaun administrativa, reforma administrativa, no reforma judisiária, reforma institusionál boot ne’e interligada no iha objetivu komun atu hadi’a forma hanesan setór públiku ne’ebé jere no funsiona ona, nune’e mós, asegura katak Estadu hala’o kuadru legalidade no seguransa jurídika efetiva no maneira ne’ebé efisiente no efikaz liu. Forma ne’e prosede kriasaun ba komisaun koordenadora, ne’ebé sei responsavel atu estabelese diresaun no vizaun jerál reforma ka programa nian, koordena dezeñu, programasaun no implementasaun konsistente reforma ne’e, atu promove sinerjia no kooperasaun entre reforma sira, halakon obstákulu no sobrepozisaun entre reforma sira, fornese apoiu polítiku ba reforma sira no garante dezempeñu no implementasaun oportuna reforma ho di’ak. Komisaun ne’e sei prezide husi Primeiru-Ministru, koadjuva husi Ministru Prezidénsia Konsellu Ministrus no integrada husi Ministru ne’ebé responsavel ba orientasaun implementasaun husi kada reforma ne’e – Ministru Finansas, Ministru Justisa no Ministru Administrasaun Estatál.
Ministru Prezidénsia Konsellu Ministrus aprezenta mós projetu Rezolusaun Governu nian, hetan aprovasaun husi Konsellu Ministrus, ne’ebé prosede alterasaun ba Rezolusaun Governu nu. 18/2019, loron 8 fulan-maiu, kona-ba Komisaun interministeriál ba Reforma Fiskál no Jestaun Finansas Públika no Rezolusaun Governu nu. 7/2019, loron 6 fulan-fevereiru, kona-ba Komisaun Interministeriál ba Koordenasaun no ba Reforma Gestaun Patromóniu Estadu. Ho alterasaun ne’e Primeiru Ministru husik-hela atu prezide Komisaun ne’e. hodi permite katak bainhira konsentra iha koordenasaun globál ba reforma institusionál sira, liuhusi prezidénsia Komisaun Koordenasaun no akompañamentu ba reforma institusionál sira. Komisaun setoriál ne’e pasa no sei lidera husi Ministru responsavel sira ba área ne’e.
Vise Primeira Ministra no Ministra Solidariedade Sosiál no Inkluzaun, Armanda Berta dos Santos halo aprezentasaun ida ba Konsellu Ministrus relasiona ho Opsaun Polítika Lejislativa sira kona-ba Fundu Rezerva Siguransa Sosiál nian no Modelu Jestaun. Objetivu husi fundu ne’e, ne’ebé kria husi Lei nu. 12/2016, loron 14 fulan-novembru, ne’e atu garante katak, kazu iha ema oitoan maka halo kontribuisaun no ema barak maka simu
Maka simu (tanba envalesimentu populasaun, ho aumentu esperansa moris nian), rejime siguransa sosiál kontinua iha osan atu selu prestasaun sira, sem nesesidade atu husu ba jerasaun foun esforsu boot ida (kontribuisaun), atu garante ba sira benefísiu hanesan. Sistema ne’e bazeia ba prinsípiu igualdade, ekidade, solidariedade entre jerasaun sira no iha jerasaun hanesan no responsabilidade públiku, ne’ebé prevee iha Konstituisaun Repúblika. aprezenta ona opsaun sira ba konstituisaun no estrutura ba Fundu, nune’e mós opsaun ba jestaun maximizasaun iha valór ativu sira. opsaun sira aprezenta sei ko’alia fila-fali iha sorumutuk Konsellu Ministru tuir-mai.
Konsellu Ministrus aprova ona projetu Deliberasaun rua, ne’ebé aprezenta husi Ministru Obras Públika, Salvador Soares dos Reis Pires, kona-ba aprovasaun ba prosedimentu ba aprovazionamentu suplementu ka alterasaun ba kontratu públiku sira relasiona ho estensaun prazu entrega obra meloramentu no manutensaun ba trosu estrada Baukau no Lautém, Maubara no Karimbala, no entre Atsabe no Mota Ain.
Ministru Obras Públika aprezenta mós projetu Rezolusaun Governu nian, ne’ebé hetan aprovasaun iha Konsellu Ministrus, relasiona ho atribuisaun ba Ponte Laleia, ne’ebé iha mota Laleia nia sorin, lokaliza iha estrada nasionál A01, ho naran “Nelson Mandela”, antigu Prezidente Áfrika Sul nian no Premiadu Nobel Paz nian, no defensór boot kauza Timor-Leste nian. Inisiativa ne’e hatama ona iha komemorasaun Loron Internasionál Nelson Mandela nian, ne’ebé marka iha loron 18 fulan-jullu, nia loron moris nian. Iha tinan ida ne’e, selebrasaun loron ne’e konta mós kopresidénsia husi antigu Prezidente Repúblika Timor-Leste no Premiadu Nobel Paz, José Ramos Horta no selebra husi nasaun sira ne’ebé partisipa iha eventu ne’e ho atribuisaun naran “Nelson Mandela” ba ponte ne’ebé reprezenta Obra no moris personalidade ne’e hanesan “Konstrutór Ponte Umanidade, mediasaun, ba rekonsiliasaun no paz”.
Konsellu Ministrus delibera atu autoriza Troka Notas entre Governu Timor-Leste no Governu Japaun, ba implementasaun Projetu Bolsa Estudu ba Dezenvolvimentu Rekursu Umanus nian. Liuhusi programa estudante timoroan sira ne’e ne’ebé sei frekuenta instituisaun ensinu superiór japoneza nian.
Konsellu Ministrus aprova Projetu Deliberasaun, ne’ebé aprezenta husi Ministru Finansas, Fernando Hanjam, relasiona ho Tetu Finál ba dotasaun orsamentál temporária ba fulan-agustu tinan 2020, ho valór ne’ebé fixa dolar amerikanu millaun 118 (ne’ebé inklui pagamentu ba empréstimu sira).
(Sitasaun: Komunikadu Imprensa Gabinete Primeiru-Ministru: S. Exa. Taur Matan Ruak)
HOTU

Imprimir   Email