Previous Next

VISE-MINISTRU EDUKASAUN, JUVENTUDE NO DESPORTU HO MINISTRU ADMINISTRASAUN ESTATAL INAGURA EDIFISIU PRE-ESKOLÁR BAURA IHA LEOREMA, LIKISA

Leorema(Likisa), 7/8/2020 - S. Exa. Vise-Ministru Edukasaun, Juventude no Desportu Dr. António Guterres hamutuk ho S. Exa. Ministru Administrasaun Estatal Dr. Miguel Pereira de Carvalho Inagura Edifisiu Pre-Eskolár Baura iha suku Leorema, Postu Administrativu Bazartete, Munisípiu Likisa.
Projetu konstrusaun ne'e konstrui hosi komunidade liuhosi fundu Programa Nasional Dezenvolvimentu Suku(PNDS) ba faze III siklu II nian ho montante orsamentu hamutuk $41.690,85.
Iha intervensaun Xefe Suku Leorema Sra. Sandra de Araújo agradese ba prezensa Vise-Ministru Edukasaun, Juventude no Desportu no Ministru Administrasaun Estatal no hato'o gratidaun ba PNDS tanba bele aloka osan no harii ona edifisiu ne'e hodi fasilita prosesu aprendizajén ba estudante sira ho diak.
Hato'o mos preukupasaun katak iha suku Leorema iha eskola balun kondisaun infraestrutura la diak liu ona, iha eskola balun seidauk hetan lisensiamentu hosi Ministériu Edukasaun, Juventude no Desportu(MEJD) inklui eskola balun iha estudante maibé la iha profesór.
Nune'e mos, Koordenadór Pre-Eskolár Baura agradese tebes tanba antes ne'e iha tempu udan no anin afeita tebes prosesu aprendizajén iha pre-eskolár ne'e maibé iha tinan 2019 komunidade deside hodi uza osan aloka ba suku liuhosi PNDS bele harii edifisiu permanente no foun ba eskola ne'e ho fasilidade kompletu no bee mos. Iha tinan 2019 mos, Governu Nova Zelándia liuhosi Programa HANDS harii ona parque infantil/playground.
Iha biban ne'e mos, Prezidente KPA Sra. Lorença Gonçalves haktuir katak projetu konstrusaun pre-eskolár Baura ne'e halo bazeia ba desizaun komunidade nian no identifika hanesan prioridade ba futuru labarik sira nian iha suku Leorema.
Iha diskursu Vise-Ministru dehan iha mandatu VIII Governu Konstitusional ne'e Ministru no Vise-Ministru MEJD identifika infraestrutura eskolár mak hanesan prioridade dahuluk tanba ne'e MEJD agradese tebes ba parseiru sira liuliu Ministériu Administrasaun Estatal liuhosi PNDS suporta suku sira hodi harii no hadia eskola barak iha teritoriu Timor laran tomak.
MEJD kada tinan liuhosi Orsamentu Jeral Estadu iha limitasaun orsamentu maibé sente la mesak no husu nafatin kontinuasaun programa PNDS ne'e.
Vise-Ministru mos hodi S. Exa. Ministru Edukasaun, Juventude no Desportu agradese ba komunidade, inan aman sira suku Leorema tanba halo sakrifisiu no servisu voluntáriu hodi harii ona eskola ne'e no husu atu kontinua kuida eskola ne'e hodi sai mahon ba estudante sira hodi eskola tanba edukasaun mak hanesan janela ba mundu no liuhosi eskola mak prepara estudante sira ba futuru ne'ebé diak.
Iha mensajén ba profesór sira Vise-Ministru husu atu kuida nafatin estudante no edifisiu foun ne'e no tenke pasiensia barak tanba hanorin estudante pre-eskolár la'os fasil.
Pre-eskolár Baura iha estudante hamutuk nain 55 no profesór nain 4.
Ba preukupasaun Xefe Suku Leorema kona-ba estatutu eskola balun la los no problema seluk, Vise-Ministru orienta Diretór Servisu Edukasaun Munisipal atu hato'o relatóriu lalais ba Ministru no Vise-Ministru Edukasaun, Juventude no Desportu hodi tetu no fo solusaun iha tempu besik.
Vise-Ministru hamutuk ho Ministru Administrasaun Estatal mos fahe sasan material sira prevensaun COVID-19 nian no husu nafatin eskola atu kumpri regra sira ne'ebé hasai ona hosi MEJD no Ministériu Saúde hanesan iha matadalan reativasaun eskola sira nian.
Eskola sira iha munisípiu Likisa 100% reativa hotu ona hahú hosi ensinu pre-eskolár to'o ensinu sekundáriu.
Antes Vise-Ministru ba halo inagurasaun, hala'o uluk vizita ba Diresaun Servisu Edukasaun Munisipal Likisa no hala'o mos vizita ba Administradór Munisipiu Likisa no partisipa mos iha enkontru Ministru Administrasaun Estatal ho Administradór Munisípiu, Administradór Postu Administrativu sira hamutuk ho Diretór sira servisu munisipal Likisa nian hodi partila mos informasaun kona-ba area edukasaun nian inklui prioridade MEJD nian no mos husu nafatin kolaborasaun diak iha mantein liña koordenasaun liuliu iha area edukasaun, juventude no desportu.
HOTU

Imprimir   Email