Díli – Tersa-feira, 16 abríl 2024
Sua Exelénsia Ministra Edukasaun Dra. Dulce de Jesus Soares no Sua Exelénsia Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos partisipa iha plenáriu hodi halo klarifikasaun kona-ba asuntu eis profesór kontratadu tinan 2023, iha Parlamentu Nasionál.
Iha plenáriu ne'e, S.E. Ministra Edukasaun Dra. Dulce de Jesus Soares hateten, jurídikamente eis profesór kontratadu tinan-2023, integra iha rejimi jerál liuhusi kontratu ba prestasaun servisu temporáriu no kontratu ida ne’e ho natureza ba prestasaun servisu ho durasaun tinan 1, hahú husi loron-1 fulan janeiru to’o loron-31 fulan dezembru tinan 2023. La'os Kareira Espesiál Dosente.
“Kontratu sira ne’e ho termu sertu, la’os Ministériu Edukasaun mak hapara, maibé natureza kontratu mak hotu iha loron 31 fulan dezembru, Ministériu Edukasaun liuhusi IX Governu Konstitusionál la hapara ema ida nia kontratu”, dehan S.E. Ministra Edukasaun.
Governante ne’e akresenta, alterasaun Dekretu-Lei 31/2023 mós la fó dalan ba Ministériu Edukasaun atu kontinua kontratu ba ema ne,ebé ho rejime jerál atu halo funsaun dosénsia no kontratu ne’e la kontinua, tanba iha kontratu ne’e rasik mós hateten, bainhira kontratu ne’e hotu sujeitu bele ba tuir teste ne’ebé mak Ministériu Edukasaun loke.
Iha fatin hanesan S.E. Sekretáriu Estadu Ensinu Sekundáriu Jerál no Ensinu Tékniku Vokasionál Sr. Domingos Lopes Lemos hateten, dadus husi profesór kontratadu ne’ebé mak tuir teste hamutuk na’in 963 no entre sira ne’e na’in 50 mak pasa iha teste ba bolsa kandidatu.
Enkuantu, ingresu espesiál art. 11 husi Dekretu-Lei kontratadu Nu. 31/2023 ne'ebé tama iha vigór, loron 1 fulan juñu, hateten mós katak ingresu espesiál ne’e ba sira ne’ebé mak avaliasaun dezempeñu rejista ona iha SIGAP, tanba ne’e eis profesór kontratadu ne’ebé asina iha tinan 2023 signifika sira nia avaliasaun dezempeñu karik atu rejista iha 2024, tanba ne’e Ministériu Edukasaun la iha responsabilidade atu halo avaliasaun dezempeñu, tanba la iha vínkulu legál depois kontratu remata iha 2023.
#MédiaME
