Bobonaro, Maliana, kinta-feira, 11 abríl 2024
Sua Exelénsia Ministra Edukasaun Dra. Dulce de Jesus Soares apresia ba obra ne’ebé estudante sira husi Eskola Téknika Agríkola Moleana, Postu Administrativu Maliana, Munisípiu Bobonaro produz, hanesan kantadeiru ba fore-sikoti, kanko, hare, junta ai-funan nomós ai-fuan sira hanesan sabraka no seluk tán.
Iha vizita ne’e S.E. Ministra Edukasaun Dra. Dulce de Jesus Soares hateten, agradese no apresia tebe-tebes ba estudante nomós profesór/a sira hotu katak kontenti tebes haree obra ne’ebé produz no husu atu kontinua komunika ba Ministériu Edukasaun kona-ba saida mak presiza tán, atu bele reforsa servisu sira ne’ebé iha.
“Pelumenus ita mai haree obra sira hanesan ne’e, ema sai husi ne’e, la’os tau liman iha bolsu no ba pasiar de’it, maibé nia hatene buat ruma, nia sai mane bonitu no matenek i nia iha obra”, dehan S.E. Ministra Edukasaun.
Governante ne’e hatutan, fila ba uma hanorin ba komunidade no viziñu sira oinsá mak halo produsaun ne’e karik seidauk hatene sira mós bele halo atu bele hetan ne’ebé di’ak ba saúde nomós bele hetan osan.
#jornalistaluis
#MédiaME
