DILI, 08/10/2013 – Prosesu verifikasaun ba dadus profesor voluntariu sira iha Timor laran tomak, lao hela iha Ministeriu Edukasaun (ME). Kuandu prosesu nee finaliza, ME sei entrega lista profesor voluntariu nian ba Komisaun Funsaun Publika (KFP), hodi prosesa sira ninia estatutu. KFP espera, lista profesor voluntariu nee konfirmadu, no laiha profesor mate klamar.

“Funsaun Publika lakohi simu lista deit, maibe lista nee tenki konfirmadu, ema nee iha duni ka lae. Tamba informasaun husi Diretur Jeral katak la kleur lista nee finaliza, maibe ita lakohi iha voluntarou nia kotuk, iha lista mate klamar. Needuni tenki halo verifikasaun didiak,” hateten Prezidente KFP, Liborio Pereira ba jornalista sira iha salaun inkontru MSS, Kaikoli-Dili, Tersa (08/10/2013).

Liborio informa, Ministru Eduksaun ho Prezidente Komisaun Funsaun Publiku sempre kontaktu ba malu. Oras nee ekipa ida lao hela. Funsaun Publika ho Ministeriu Edukasaun buka identifika ema ruma nebe naran duplikadu. Kuandu hetan naran duplikadu ka ema laiha maibe naran iha lista, nee diretamente hamoos kedas husi sistema.

Nia hanoin, importante duni atu identifika didiak ema nebe servisu nudar profesor voluntariu, hodi evita profesor mate klamar mosu. Tanba estadu mak sei lakon nafatin. Needuni, presia evita husi inisiu kedas.

Entretantu Eugenio da Conceição, nudar Profesor Voluntariu, haktuir, durante nee nia hanorin tinan lima ba leten ona, maibe seidauk foti sira sai funsionariu permanente. “Tamba nee ami husu ba governu halo lalais verifikasaun, atu nunee bele tau matan ba ami nia voluntariu nee,” nia espera.

Nunee mos jornalista koko atu konfirma asuntu nee ba Ministru Edukasaun, maibe tuir informasaun husi funsionariu Ministeriu Edukasaun nia balun dehan, ministru agora laiha fatin, tamba sai ba halo inkontru ho importante iha fatin balun. João Anibal

Fontes : Suara Timor Lorosae