Dili, 13 Sep 2013 - Edukasaun seitor ida importante ba Nasaun, atu lori nasaun nee ba oin ho dezenvolvimentu, seitor edukasaun tenke sai prioridade ba Nasaun.
Reprezentante povu iha uma fukun Parlamentu Nasional, ejiji Governu atu tau prioridade ba seitor edukasaun, tamba seitor ida nee rungu ranga tebes iha Timor laran tomak depois tinan resin Timor Leste hetan nia independensia.
“Iha Dili laran deit ita hare situasaun edukasaun nian grave tebes, vizita PR ninian ba distritu, ita hare duni realidade ida nee, deske uluk kedan ami hanoin diak liu investe makaas iha seitor edukasaun hodi bele garante sustentabilidade rai nee nian ba moris naruk,” hatete Deputadu Fransisco Branco, husi bankada FRETILIN ba STL iha edifisiu Parlamentu Nasional, Kuarta (12/09/2013).
Dezenvolve seitor edukasaun, katak Branco, laos atu hetan deit diploma, maibe importante ema nebe atu hetan diploma tenke iha kuinesementu nebe diak iha area espesilizada nebe sira hetan atraves formasaun formal no mos informal. “So hanesan nee maka bele garante futuru rai nee ba oin, bainhira dezenvolvimentu edukasaun para hetan deit diploma, ida nee sei lori problema ba nasaun iha futuru.
Deputadu Fretilin nee informa, agora daudauk estatistikamente, TL iha grafiku ida aas tebes konaba formasaun mestradu, doutoramentu ho legislature, maibe ba kapasidade sei duvidas tebes. Tamba nee primeiru prioridade dezenvolvementu nasional nian maka tenke investe seriu iha edukasaun.
Iha fatin hanesan II Vise Prezidente Parlamentu Nasional, Aderito Hugo da Costa, hateten vizita Prezidente Republika Taur Matan Ruak nian ba distritu atu hare direitamente kondisaun edukasaun nian iha rai laran, tanba PR iha nia papel ida maka atu halo fiskalizasaun no observasaun ba dezenvolmentu Nasaun. “Maibe papel ida nebe importante, governu atu hare fasilidade eskolar, durante ukun aan tinan 11, ita iha investimentu makaas ba iha seitor edukasaun, investimentu laos ba deit infra-estrutura, maibe hare mos rekursu humanus,” hatete Hugo.
Problema nebe seitor edukasaun infrenta katak Aderito, laos deit fasilidade infra-estrutura eskola nian, maibe maioria eskola iha timor laran tomak sei falta kadeira, meza, salaun, livru, professor voluntariu no asuntu importante sira seluk inklui uma eskola.

Fontes : Suara Timor Lorosae