DILI – 13 Sep 2013 - Prosesu verifikasaun ba dadus professores voluntariu husi tinan 2012 ba kotuk, hetan ona ninia numeru provizoriu. Tuir dadus Ministeriu Edukasaun nian, professor voluntariu hamutuk rihun hat atus rua, rua nulu (4.220) nebe namkari iha teritoriu Timor laran tomak. Infelizmente, too agora governu seidauk fo osan ruma hodi valoriza sira nia servisu.
Total ida nee, iha posibilidade aumenta, karik governu iha tan dadus tinan 2013 nian. “Nee so tinan 2012 ba kotuk. Ba dadus iha 2013 nian, ida nee ami seidauk foti,” deklara Diretor Jeral Servisu Kooperativus Ministeriu Edukasaun, Antoninho Pires ba STL iha nia knar fatin, Kinta (12/09/2013).
Governu Timor-Leste too oras nee seidauk prevee orsamentu ba professor hirak nebe ho estatutu voluntariu. Tuir planu, kuandu prosesu konversaun husi voluntariu ba permanente halo ona, mak foin bele iha remunerasaun ba numeru profesores sira nee.
“Profesores voluntariu sira nee, agora dadaun ami seidauk fo orsamentu ba sira, tanba buat hotu sei lao tuir prosesu. Se prosesu nee hotu ona, entaun ami foin fo,” nia esplika.
Antoninho rekuinese, prosesu atu foti voluntariu sira ba permanente nee mos la fasil, tanba laos Ministeriu Edukasaun mesak mak desidi. Prosesu ida nee sei halo koordenasaun ho Komisaun Funsaun Publika. Iha Timor laran tomak, total professores hamutuk rihun sanulu resin ida, atus walu, lima nulu (11.850). Iha mos hanoin ida atu aumenta tan professores 4 mil resin tuir dadus voluntariu nebe Ministeriu Edukasaun identifika ona. Nunee bele iha proporsionalidade ba alunus ho numeru 380.000 iha Timor laran tomak.
“Ita sei hare ba mapa jeografia ou ita nia kondisaun, maka ami sei halo fali mapamentu eskolar, para hodi konta profesores sira nee didiak no mos hanorin alunus sira ho diak,” katak Antoninho.
Planu atu akumula profesores voluntariu sira nee, hetan apresiasaun husi Uma Fukun Parlamentu Nasional (PN). Segundu Vise Prezente PN, Aderito Hugo da Costa hanoin katak, profesores voluntariu rihun 4 resin nee, bele reforsa ka ajuda tan profesores permanente sira iha eskola hotu. Needuni, governu tenki tau prioridade hodi prosesa profesores voluntariu sira ninia distinu.
Diretor Luta Hamutuk, Mercio Akara mos iha ninia hanoin hanesan, katak, se hakarak edukasaun nee lao ba oin, governu presiza fo atensaun ba professores voluntariu sira nee, para sira mos iha vontade nafatin hodi ajuda professores permanente sira nee hanorin estudante ho diak nafatin.
Nia hanoin, governu liu husi Ministeriu Edukasaun tenki fo salariu ba profesores voluntariu sira, para sira nafatin hanorin diak, fokus los ba materia nebe mak sira hanorin. Problema nee laos deit ba iha eskola balun, maibe tenki hare komesa husi eskola pre-primaria too universidade. Se sira la hetan salariu ruma, maka sira mos hanorin laiha vontade, tanba futuru nasaun nee nian, iha mos edukasaun nia liman. Mj7/Mj2/Alm

Fontes : Suara Timor Lorosae