COLÉGIO DE SANTO ANTÓNIO DE LACLUTA: Ezemplu Di’ak Ida Kona-ba Empoderamentu Lokal

Diskursu Sua Ekselensia Ministra da Educação, Juventude e Desporto, Dulce de Jesus Soares, ba Inaugurasaun Eskola Colégio De Santo António De Lacluta - 19 Setembru, 2018.
S.E. Embaixadór de Portugal, Sr. João Pedro Viera;
Sr. Diretór da Fundação Diocesana, Baucau, Reverendíssimo Amo Abel;
Reverendíssimo Sra. Madre Directora Congregação das Religiosas Escravas da Eucaristia e da Mãe de Deus;
Nai Veteranu sira, Autoridade Lokál no Lideransa Komunitáriu sira;
Doben Professor sira, Estudante no Inan-Aman sira;

Dader diak!
Sorte boot!!!! Foin to’o iha-ne’e ha’u haree eskola ida-ne’e furak loos!
Eskola nia kualidade di’ak, moos no nia arkitetura mós kapás tebes. Ha’u gosta edifísiu ida ne’e, no fiar katak sei ajuda alunu sira atu aprende. Maibé buat ne’ebé hau gosta liu, mak oinsa eskola ida-ne’e sai rezultadu hosi esforsu Ita-Boot sira-nian.
Ita-Boot sira la hein de’it to’o Estadu fó buat ruma, maibé Ita-Boot sira rasik hola inisiativa atu identifika ita-nia nesesidade rasik, no buka fundus no maneira atu ezekuta.

Ida-ne’e mak ezemplu di’ak kona-ba empoderamentu local – katak komunidade hakbiit-an rasik atu dezenvolve sira-nia knuuk ka fatin ba buka hatene no hetan matenek futuru nian.

No mós sorte boot katak Ita-Boot sira hetan belun di’ak ida-ne’ebé simu duni pedidu no fó apoiu ne’ebé presiza. Nune’e, ha’u-nia agradesimentu boot ba S.E. Embaixadór, ne’ebé reprezenta nasaun-Portugál iha ne’e, ne’ebé mak liuhosi sira-nia eskema Fundu ba Projetu ki’ik sira mak finansia eskola ida-ne’e. Projetu ida-ne’e loloos ezemplu ekselente kona-ba kooperasaun, inovasaun no parseria. Parabéns no Obrigada wa’in bá Ita-Boot sira hotu.
Eskola ida-ne’e nia li’ur reprezenta ha’u-nia vizaun bá Edukasaun iha Timor-Leste komunidade hamutuk envolve iha atividade eskola nian, no eskola mak seguru no fasilita atu alunu sira bele estuda iha ambiente ne’ebé apoia duni sira - moos no konfortavel. Maibé aparénsia la’ós hotu. Li’ur bele pinta halo furak ka bonitu, ho estrutura konstrusaun ida forte no metin, maibé atividade ne’ebé akontese iha laran mak importante liu.
Nune’e ha’u hakarak asegura katak buat ne’ebé akontese iha laran furak hanesan iha li’ur-katak prosesu ensinu-aprendizajen la’o ho dixiplina duno ativu, no katak hotu ne’ebé akontese entre didin-lolon sira-ne’e mak sentradu ba alunu- atu enkoraja ninia aprendizajen partisipativu, no mós atu asegura ninia rahun-di’ak.
Ba ida-ne’e, profesór sira tenke dezenvolve relasaun domin no respeituozu ho alunu sira. Sai profesór la’ós atu hanorin lee no matemátika de’it, maibé atu hanorin kualidade sira hotu ne’ebé sei ajuda labarik sira sai sidadaun di’ak aban bainrua. Nune’e, hanorin dixiplina akadémiku sira ho didi’ak, maibé no mós keta haluha atu hanorin alunu sira domin ba malu, respeitu ba malu no ba ema boot sira, hanoin krítiku, no promove nafatin prevensaun konflitu.
Tanba abilidade sira-ne’e, ne’ebé hanaran ‘aprendizajen sosio-emosionál’, mak xave ba formasaun ema nian, no mós tuir peskiza barak, alunu sira-ne’ebé dezenvolvidu liu iha área sosio-emosionál mós hetan dezempeñu akadémiku aas liu. No liuliu eskola ida-ne’e, ne’ebé parte Diocese Viqueque nian, presiza asegura katak profesór sai apóstolu loloos Jesus nian, ne’ebé tenke habelar domin no kompaixaun ba eskola ida-ne’e.
Aleinde haree edifísiu ho kuidadu, ha’u mós dezafia imi atu estuda ho forsa-vontade, atu la’ós dekór informasaun de’it, maibé analiza no buka atu aplika buat ne’ebé aprende atu hadi’a ita-nia komunidade nia moris. Tan ita bá eskola la’ós atu hariku ita-nia an de’it, maibé atu dezenvolve nasaun, família no Komunidade nia moris. Hanesan ha’u dehan uluk – imi mak nasaun nia esperansa, nune’e bainhira ha’u-nia jerasaun ferik-katuas ona, ami sei depende ba imi atu asegura ami-nia moris di’ak.
Ikus liu, ha’u hakarak fó mensajen espesiál ba inan-aman sira. Nu’udar inan, ha’u mós komprende Ita-Boot sira-nia sakrifísiu atu fó eskola di’ak ba oan sira. La fasil, entre kuru bee, hein labarik, hili ai, te’in, halo to’os, no serbisu barak seluk tan, atu mós fó tempu ba labarik sira atu bá eskola, no kalan halo TPC. Maibé Ita-Boot sira fó tempu duni, tanba hatene katak só edukasaun bele eleva imi-nia moris.
Maibé nu’udar membru komunidade, ha’u mós sei dezafia Ita-Boot sira: haree eskola ne’e ho respeitu hanesan haree igreja – keta husik animal tama no estraga, keta soe fo’er iha resintu eskolár nia laran, no asegura eskola ne’e nia seguransa. Partisipa ho ativu iha enkontru no asosiasaun inan-aman sira-nian, no kontribui Ita-Boot sira-nia matenek atu dezenvolve eskola ho liután.
Tanba Ita-Boot sira ida-idak iha talentu ruma ne’ebé bele kontribui ba eskola ida-ne’e: balu bele ajuda ho to’os eskolár, balu bele hanorin estra kurrikulár hanesan dansa ka múzika tradisionál, soru tais, no buat sira seluk. Balu bele ajuda ho finansas, balu ho manutensaun, no balu bele ajuda profesór iha sala de aula ka durante aula reforsu sira atu fó apoiu adisionál ba alunu sira-ne’ebé karik presiza tulun estra.
Maibé Ita-Boot sira HOTU bele asegura katak oan sira estuda no bá eskola loro loron, no HOTU bele hanorin sira iha uma atu sai edukadu. Tanba se profesór sira hanorin atu ko’alia ho respeitu, maibé Ita-Boot sira hanorin atu tolok, sé mak sala? Edukasaun mai hosi eskola NO MÓS hosi uma. Nune’e, haree oan sira ho didi’ak, tanba sira-nia dezempeñu no aproveita ba eskola ida-ne’e mós depende ba Ita-Boot sira-nia knaar ne’ebé halo nu’udar inan-aman.
Nune’e, dala ida tan ha’u hakarak fó parabéns ba Commissão Nacional da Educação Católica de Timor-Leste, no Fundação Diocesana, Departamento da Educação de São José Baucau, no ema hotu ne’ebé envolve ho Colégio de Santo António Lacluta, tanba konsege harii eskola furak ne’e. No ha’u-nia agradesimentu espesiál dala ida tan ba S.E. Embaixadór no nasaun no povu Portugés, ne’ebé liuhosi sira-nia laran-luak halo Ita-Boot sira-nia mehi sai fali realidade.
Obrigada barak.