Eskola Ensinu Báziku Filiál públiku (EBF) Suku Busira, Sub-Distritu Iliomar, Distritu Lautem kondisaun sei aat, kadeira no meza la sufisiente, livru la sufisiente atu hala’o prosesu aprendizájen ho kualidade.
Lia hirak ne’e hato’o husi koordenadór EBF Busira, Alexandre Serba Roza loron 09/09/2014 iha edifísiu EBF Busira, Iliomar.
Tan kadeira ho meza la to’o ba alunu sira iha sala, profesór sira hola inisiativa halo banku, kadeira no meza ba estudante sira hodi tuur, tuir prosesu aprendizájen. Inisiativa ida ne’e la’ós halo meza kadeira no banku ba labarik sira de’it maibé, profesór sira mós halo armáriu hodi tau livru ba laran iha sira-nia eskola. Durante ne’e, profesór sira-nia eskritóriu laiha armáiru atu tau livru eskola nian, ne’duni maka hamosu inisiativa ida ne’e.
Seidauk iha Biblioteka no falta sala
Iliomar. Eskola Ensinu Báziku Públiku Filial Iradarate Iliomar total alunu hamutuk 189, ho profesór na’in hitu, (7), inklui profesór kontratadu na’in 1.
Iha eskola ne’e sala né’en, sala tolu maka diak uza ba prosesu aprendizajen, no sala tolu seluk sei áat hela maibé iha prosesu atu hadia iha tinan ida ne’e.
Kestaun ne’e hato’o husi koordenadór Ensinu Báziku Filial Iradarate, Paulo Pinto iha nia knár fatin loron 09/09/2014.
ME iha ona kadeira no meza atu fahe!!
Abilio Jerónimo, Diretór adjuntu Ensinu Báziku Sentral Sub Distritu Iliomar, Distritu Lautem, hateten katak, Labarik sira kuaze 500 resin sei tuur iha rai tanba, kadeira ne’ebé distribui husi ministériu edukasaun maka sei menus liu. Tinan-tinan ministériu distribui mai nafatin maibé númeru alunus sira barak liu maka balun sei tuur iha rai.
Diretór adjuntu, Abilio Jerónimo kasu lia hirak ne’e, iha loron 09/09/2014 iha nia knár fatin EBC Iliomar.
